نون

النون
ندى على وردة حلوة الصبح بتفتّح
نور يملا العيون وعلينا بيصبّح
نفتح شبابيك الأمل على يوم جديد
مع إن كل يوم لأمبارح يعيد
نملى الكفوف بالمية ونرش الوشوش
نغسل معاها حلمنا اللي معشناهوش
بعد السكات
تطلع حاجات
تقتل سبات الضلمة وتزيح الستار
على مسرحية بنمثلها ليل نهار
نلقى البنات بالمريلات ع المدرسة رايحين
والأرزقية لأكل عيشهم ع الشقا ناويين
وصنايعي يفتح ورشته
نجار يحضر عدّته
وشاكوش بيبدء دقته
ويرن جرس المدرسة
على الحساب والهندسة
والدوشة بعد الوشوشة
والنون نقار بين الجارات
ف سياسة ولا مهاترات
والنون نظام بنكسّره
وعلى هوانا نفسره
والنون نجاح نستنظره
لو يجي مش بنقدّره
والنون نقاش ع القهوة دار
بين اللي فاهم والحمار
يمكن يطول حتى النهار
والنون نحارب بعضنا
على لقمة رايحة للي رازقه ربنا
والنون نغرّب شمسنا
تمشي وما تسأل عننا
والنوم يسرسب بعضنا
نلقى البيوت بتلمّنا
ولصبح بكرة تعدّنا
والنون نعاس نوم ملل
والنون نهار نشاط أمل
والنون نصب نهب قتل

ثلاثية

(1) لما رضيت بالهم

لما رضيت بالهم
والهم مش راضي
لما طفحت الدم
والجيب فضل فاضي
كسبت أيه يا عم
لا عقار ولا أراضي
وخرجت منها وحيد
الأيد تنفض أيد
بتقولها ليه بتنهيد
مكبوس وبتداري
كما صفر على الشمال
لا بيا ميزانها مال
ولا هي شايفاني
ف الذكر مش مذكور
مع أني ماضي حضور
ف دفتر أحوالي
وعليها مش محسوب
لو ضيف ومش مرغوب
ألم ف عزالي
على أمري ليه مغلوب
والوضع صار مقلوب
يصعب عليك حالي
لما رضيت بالهم

(2)العمر مش بعزقة

و أبقي أعزريني بأه
دا العمر مش بعزقة
وأنا لازم أبقى بخيل
من بعد طول الشقا
وكرامة متعلقة
ف الحبل والمشنقة
يا مصر ليه ضيقة
ع اللي أليكي يميل
ولو أنتي كارهه اللقا
ياريت نلاقي بديل
دا أنا لو أموت ف الغربة
ويمص دمي كفيل
ولا أني أعيش جواكي
منكسر وذليل
والهم ماليني
ولا شربة من نيلي
تقدر تداوي عليل
وجراحي مخفية
والعيب ماهوش فيا
ف سكّتي اللايمين
وأبقي أعزريني بأه
دا العمر مش بعزقة
وأنا لازم أبقى بخيل

(3)السكه مش سهلة

أنا طير يتيم الوطن
عن حضن بلده أتفطم
بدري على أواني
الغصن صابه الوهن
والعش لما أنهدم
جناحاتي وجعاني
طاير بلا وجهه
لا هروب ولا مواجهه
والسكه مش سهله
كل الدروب قافله
و رافضه تلقاني
لا يوم لقيت ملجأ
وفرصتي بتغرق
ف بحر مش ضيق
أمواجه بلعاني
دا لكل طير مينا
يرسى ف مراسيها
ولو يكون فيها
مجروح وبيعاني
ولا ليا غير دارها
ومهما أغيب عنها
برغم تقصيرها
برجع لها تاني

مواطن سلبي

أنا...من مكاني ده

و بصوت ماهوش عالي

راح اعلن موقفي

و أقول...و أنا مالي

بأرادة مسلوبة

و حقيقة مقلوبة

يا عم خلليني

أربّي ف عيالي

و أنا هامشي جنب الحيط

و هاقبل الفتافيت

و أمسك ف طرف الخيط

بأيديا و سناني

و أبقى ف ديل القطيع

و ها يأمروني وأطيع

و مدلدلة وداني

قافل عليا الباب

لا بشارك ف أنتخاب

و لا ليا ف الأضراب

يا ناس...أنا ف حالي

و لا يوم هأرفع قضية

على شركة الميّة

ولا مرة هاشكيلكم

من كبدي و طحالي

و هافضل أشربها

مخلوطة بمجاري

مصرية

مصرية
ومش براجل لأ مية
وست بيت ومربّية
وكمان وزيرة إقتصادية
حزم وصرامة بحنيّة
ولما أطش الملوخية
تشمها م السعودية
.............
مصرية من راسي لرجلي
بأصحي من النجمة وبدري
على أكل عيشي أقوم أجري
راضية بأرزاقي وأجري
..............
وأحب بس ف بلدي أعيش
أقفل عليا قزاز أو شيش
ولا أخدشي م العالم بقشيش
وحامدة ربي ولو معاييش
وإن شالله أكله حاف العيش
...............
مصرية وبحب المصري
والجدعنة طبعي وأصلي
ف الفجر لعيالي أنا بادعي
وأقول يا درجاتهم أعلي
.................
ف عنيّا أشيله أبو عيالي
وعشانه راح أبيع خلخالي
وأديله صيغتي وأموالي
مدام عليا البيت مالي
.................
مصرية جد ومش بهزار
ورصيدي من عند وإصرار
واضحة ومعنديش أسرار
ولا أخافش من ظالم جبار
....................
مصرية
ومش براجل لأ مية
وست بيت ومربيّة
بس ما تقولشي وليّة

قلبي يا مسكين

قلبي يا مسكين
ياللي فرحك أبتسامك مجروحين
قوللي ليه دايما وحيد دايما حزين
قلبي يا مسكين
ياللي سكة الهوي عنك بعيدة
وياللي دمعتك قريبة
قلبي يا مسكين
يا حبايبي فيك قاعدين متربعين
ولو تهون عليهم هم مش هاينين
ومهما باعوا فينا أحنا مش بايعين
قلبي يا مسكين
ياللي سجنك بين ضلوعك
قوللي مين هيهمه عطشك ولا جوعك
مين يكون فوسط الريح قلوعك
ولما تبكي مين هيمسحلك دموعك
قلبي يا مسكين
قوللي مين

لحظة وداع

لحظة وداع وقفت قدامها ف زهول
لحظة والصمت فيها أبدي من القول
الكلام غرقان فدمعة لسة واقفة عالجفون
والدموع أحسن كلام للي مش عارف يعبر أو يقول
لينا بخت نشوفكو تاني
لينا عمر للقا
ولا الفراق المرة دي هيكون أخر فراق
ويا أخر مرة للقا
والدموع تصبح بحور
تفضل تقول
الكلام اللي الشفايف خايفة تنطقة
اه يا غربة ياللي واجعة قلبنا
اه يا غربة ياللي مانعة دايما فرحنا
جمعينا مرة وفرقينا ميت مليون سنة
والدموع تعلا بصوت
بعد ما كانت سكوت
والعيون تفضل تقول
يمكن نموت
ما نشوفش تاني بعضنا
الفراق يبقي أنين
وصوت الحنين
يملا الأيدين
في سلام يطول
بين دول ودول
لحظة لقا ولحظة فراق
بتمر بينا من ميلادنا للممات
نلعن سنين الغربة والسفر
ولقمة العيش اللي بتذل البشر
وغربة بأدينا وأحنا نقول قدر
والدموع تملى البحور
تفصل ما بينا وبين بلادكوا بحور
في البر ده واقفين بمراكبنا
والبر ده أنتوا بمجاديفكوا
والمركبة من غير قلوع
واه يا قلبي يا موجوع
أمتى الرجوع
أمتى الرجوع

الدنيا

الدنيا سيرك وانا ماشي علي حبالها

تميل بيا أميل لأجل أعدلها

ماعرفش أميل وياها واعدّيلها

ولا أميل عكسها وأصدلها

وبين ميل وميل كله برضه ميل

ماعرفش أمتي بس يتعدل حالها

في الدنيا دي عايش انا بهلوان

ساعات علي الحبل أقف وساعات علي العصيان

وفي الحالتين انا فاقد الاتزان

تقلان لساني عن الكلام مش عارف أقول

ولا عارف أحكي ولا عارف أشكي ولا حتي الأماني بطول

والدنيا دي كنهها أمل وأنتظار وصبر

الأمل نجمة بعيدة في السما مابنطولهاش

العين عليها لكن أيديك ماتلمسهاش

تلمع وتضوي في ليلك وبالنهار مابتشوفهاش

و علي المحطة قعدت أستني قطري ولا جاش

والتذكرة يومها ادوهالي ببلاش

لما زقهت من الانتظار فقلت انا ماشي

قالولي القطر فرصة والفرصة ماتستناش

تعدي قدامك مرة وماتعيدهاش

تعدي قدامك ويالحقتها يا ملحقتهاش

وانا اللي كنت فاكرك ياقطري انا قشاش

اتاري القطر طلع غشاش

انا ياللي تذكرتي كانت انتظار من غير وصول

قالولي أصبر بكره يمكن تنول

والصبر بحر غويط فيه السمك يغرق

هتعمل أيه انت ياللي ما بتعرف تعوم

في قشاية أمل علقت أحلامي

ونزلت بحر الصبر وما شفت قدامي

والبحر طول بعرض وماله بر

والشمس تحرق والبحر مالح مر

وفي انتظاري صبرت لما الصبر مني مل