نون

النون
ندى على وردة حلوة الصبح بتفتّح
نور يملا العيون وعلينا بيصبّح
نفتح شبابيك الأمل على يوم جديد
مع إن كل يوم لأمبارح يعيد
نملى الكفوف بالمية ونرش الوشوش
نغسل معاها حلمنا اللي معشناهوش
بعد السكات
تطلع حاجات
تقتل سبات الضلمة وتزيح الستار
على مسرحية بنمثلها ليل نهار
نلقى البنات بالمريلات ع المدرسة رايحين
والأرزقية لأكل عيشهم ع الشقا ناويين
وصنايعي يفتح ورشته
نجار يحضر عدّته
وشاكوش بيبدء دقته
ويرن جرس المدرسة
على الحساب والهندسة
والدوشة بعد الوشوشة
والنون نقار بين الجارات
ف سياسة ولا مهاترات
والنون نظام بنكسّره
وعلى هوانا نفسره
والنون نجاح نستنظره
لو يجي مش بنقدّره
والنون نقاش ع القهوة دار
بين اللي فاهم والحمار
يمكن يطول حتى النهار
والنون نحارب بعضنا
على لقمة رايحة للي رازقه ربنا
والنون نغرّب شمسنا
تمشي وما تسأل عننا
والنوم يسرسب بعضنا
نلقى البيوت بتلمّنا
ولصبح بكرة تعدّنا
والنون نعاس نوم ملل
والنون نهار نشاط أمل
والنون نصب نهب قتل

ثلاثية

(1) لما رضيت بالهم

لما رضيت بالهم
والهم مش راضي
لما طفحت الدم
والجيب فضل فاضي
كسبت أيه يا عم
لا عقار ولا أراضي
وخرجت منها وحيد
الأيد تنفض أيد
بتقولها ليه بتنهيد
مكبوس وبتداري
كما صفر على الشمال
لا بيا ميزانها مال
ولا هي شايفاني
ف الذكر مش مذكور
مع أني ماضي حضور
ف دفتر أحوالي
وعليها مش محسوب
لو ضيف ومش مرغوب
ألم ف عزالي
على أمري ليه مغلوب
والوضع صار مقلوب
يصعب عليك حالي
لما رضيت بالهم

(2)العمر مش بعزقة

و أبقي أعزريني بأه
دا العمر مش بعزقة
وأنا لازم أبقى بخيل
من بعد طول الشقا
وكرامة متعلقة
ف الحبل والمشنقة
يا مصر ليه ضيقة
ع اللي أليكي يميل
ولو أنتي كارهه اللقا
ياريت نلاقي بديل
دا أنا لو أموت ف الغربة
ويمص دمي كفيل
ولا أني أعيش جواكي
منكسر وذليل
والهم ماليني
ولا شربة من نيلي
تقدر تداوي عليل
وجراحي مخفية
والعيب ماهوش فيا
ف سكّتي اللايمين
وأبقي أعزريني بأه
دا العمر مش بعزقة
وأنا لازم أبقى بخيل

(3)السكه مش سهلة

أنا طير يتيم الوطن
عن حضن بلده أتفطم
بدري على أواني
الغصن صابه الوهن
والعش لما أنهدم
جناحاتي وجعاني
طاير بلا وجهه
لا هروب ولا مواجهه
والسكه مش سهله
كل الدروب قافله
و رافضه تلقاني
لا يوم لقيت ملجأ
وفرصتي بتغرق
ف بحر مش ضيق
أمواجه بلعاني
دا لكل طير مينا
يرسى ف مراسيها
ولو يكون فيها
مجروح وبيعاني
ولا ليا غير دارها
ومهما أغيب عنها
برغم تقصيرها
برجع لها تاني

مواطن سلبي

أنا...من مكاني ده

و بصوت ماهوش عالي

راح اعلن موقفي

و أقول...و أنا مالي

بأرادة مسلوبة

و حقيقة مقلوبة

يا عم خلليني

أربّي ف عيالي

و أنا هامشي جنب الحيط

و هاقبل الفتافيت

و أمسك ف طرف الخيط

بأيديا و سناني

و أبقى ف ديل القطيع

و ها يأمروني وأطيع

و مدلدلة وداني

قافل عليا الباب

لا بشارك ف أنتخاب

و لا ليا ف الأضراب

يا ناس...أنا ف حالي

و لا يوم هأرفع قضية

على شركة الميّة

ولا مرة هاشكيلكم

من كبدي و طحالي

و هافضل أشربها

مخلوطة بمجاري