لحظة وداع

لحظة وداع وقفت قدامها ف زهول
لحظة والصمت فيها أبدي من القول
الكلام غرقان فدمعة لسة واقفة عالجفون
والدموع أحسن كلام للي مش عارف يعبر أو يقول
لينا بخت نشوفكو تاني
لينا عمر للقا
ولا الفراق المرة دي هيكون أخر فراق
ويا أخر مرة للقا
والدموع تصبح بحور
تفضل تقول
الكلام اللي الشفايف خايفة تنطقة
اه يا غربة ياللي واجعة قلبنا
اه يا غربة ياللي مانعة دايما فرحنا
جمعينا مرة وفرقينا ميت مليون سنة
والدموع تعلا بصوت
بعد ما كانت سكوت
والعيون تفضل تقول
يمكن نموت
ما نشوفش تاني بعضنا
الفراق يبقي أنين
وصوت الحنين
يملا الأيدين
في سلام يطول
بين دول ودول
لحظة لقا ولحظة فراق
بتمر بينا من ميلادنا للممات
نلعن سنين الغربة والسفر
ولقمة العيش اللي بتذل البشر
وغربة بأدينا وأحنا نقول قدر
والدموع تملى البحور
تفصل ما بينا وبين بلادكوا بحور
في البر ده واقفين بمراكبنا
والبر ده أنتوا بمجاديفكوا
والمركبة من غير قلوع
واه يا قلبي يا موجوع
أمتى الرجوع
أمتى الرجوع

الدنيا

الدنيا سيرك وانا ماشي علي حبالها

تميل بيا أميل لأجل أعدلها

ماعرفش أميل وياها واعدّيلها

ولا أميل عكسها وأصدلها

وبين ميل وميل كله برضه ميل

ماعرفش أمتي بس يتعدل حالها

في الدنيا دي عايش انا بهلوان

ساعات علي الحبل أقف وساعات علي العصيان

وفي الحالتين انا فاقد الاتزان

تقلان لساني عن الكلام مش عارف أقول

ولا عارف أحكي ولا عارف أشكي ولا حتي الأماني بطول

والدنيا دي كنهها أمل وأنتظار وصبر

الأمل نجمة بعيدة في السما مابنطولهاش

العين عليها لكن أيديك ماتلمسهاش

تلمع وتضوي في ليلك وبالنهار مابتشوفهاش

و علي المحطة قعدت أستني قطري ولا جاش

والتذكرة يومها ادوهالي ببلاش

لما زقهت من الانتظار فقلت انا ماشي

قالولي القطر فرصة والفرصة ماتستناش

تعدي قدامك مرة وماتعيدهاش

تعدي قدامك ويالحقتها يا ملحقتهاش

وانا اللي كنت فاكرك ياقطري انا قشاش

اتاري القطر طلع غشاش

انا ياللي تذكرتي كانت انتظار من غير وصول

قالولي أصبر بكره يمكن تنول

والصبر بحر غويط فيه السمك يغرق

هتعمل أيه انت ياللي ما بتعرف تعوم

في قشاية أمل علقت أحلامي

ونزلت بحر الصبر وما شفت قدامي

والبحر طول بعرض وماله بر

والشمس تحرق والبحر مالح مر

وفي انتظاري صبرت لما الصبر مني مل

داري يا داري

لو راضية ترحالي

لميلي ف عزالي

وكتبي وأقلامي

أفراحي وأحزاني

وسلميلي يا دار

علي كل جارة وجار

ع القرب والأغراب

وده بابه جنب الباب

ع الصحبة والأحباب

ولا تنسي حد يا دار

وسلميلي كمان

علي شجرة تحتي تمام

كنت م الشباك

ارويها يوماتي

مرة بالأحلام

ومرة بدمعاتي

وكبرت الشجرة

ووصلت القمرة

وانا سبتها ومشيت

وبضلها ما أحتميت

م الشمس و الغربة

وانا لو قالولي البيت

ماعرفش عنواني

ده انتي الدفا والبيت

وانتي اللي انا حبيت

وف حضنك اتربيت

وعشت ايامي

داري يا داري

وانا مهما الف وادور

لابد هاجي أزور

وابكي علي الاطلال

خايف أروح لبعيد

والشوق ف قلبي يزيد

وانا اللي بيكي خليت

وعنك اتخليت

والدنيا لهياني

خايف ل يجي اليوم

ألقاكي ناسياني

وانا اللي مالي بيت

والحيطة جنب الحيط

هي اللي لماني

داري يا داري

انا ه امشي يا داري

لو انتي سامحة لي